唔好意思同上一篇更新好似隔咗好耐都無聲無氣，因為今個星期好忙(Black Friday)……幾日間間屋多咗部電視、Soundbar、吸塵機、一啲廚房用具同小電器、Mon、Printer等等，要不斷收嘢拆箱執嘢，所以無第一時間Update大家。
“Are you sitting right now? “
“Yes……”
其實撞正趕頭趕命準備揸車出去接個仔放學。
“Your offer is being accepted by the vendor. Congrats!”
跟住就簡單約咗個Agent第二日早上去佢公司交低本Passport做登記手續，就匆匆咁收線揸車出去接個仔放學。
就係咁……我哋在同一Post Code上分別出價嘅兩間屋都成功被賣家接受，亦可以同時開始進入之後嘅買賣程序，我就試下歸納下呢個星期入面我哋進行咗啲乜。
利申：以下有關稅務嘅分享都只係個人經歷嘅分享，並不構成任何稅務建議。
去地產度交低Passport時就會問我哋用邊個做買家，其中一個可能大家都會關心嘅就係兩公婆聯名買定係只用其中一方個名買，我哋都有諗過會唔會用其中一方個名去買，之後另一個將來會唔會可以再用First time buyer身份去買第二個物業慳返啲印花稅，經過我哋再三確認之後，係唔得嘅，英國會將結咗婚嘅兩公婆計做一個單位，所以只要其中一方在地球上任何一個地方持有物業，基本上你已經唔再係First time buyer，另外如果你買嘅物業唔係自住，而係出租，佢都會收高啲嗰個印花稅。
重要嘢講多次，Stamp Duty Holiday係去到出年三月底，同埋係指正式完成交易嘅日期，呢度一般房地產買賣都要需時三個月(好取決於條Property Chain，即係賣家搵到屋搬未，佢搵到嗰間屋嘅賣家又搵到屋搬未，買家又要睇駛唔駛賣咗現有物業先完成交易，一環扣一環，所以我哋呢啲無Property Chain嘅買家理論上都有一定吸引力)，所以如果希望享受到Stamp Duty Holiday的話都要睇下個時間性。
我哋嘅律師有俾咗條Link係可以幫到我哋好簡單咁計到要俾嘅印花稅同埋相關資料，大家有需要都可以睇下：
https://www.stampdutycalculator.org.uk/
律師方面我哋就有問而家租緊呢度嘅HKer業主介紹，同埋亦有朋友親戚在英國做物業買賣嘅律師，所以我哋都分別有問價錢同比較下，最後其實價錢都唔係最主要考慮因素，揀咗朋友嘅親戚因為我哋可以隨時Whatsapp同佢溝通，雖然都係打英文多，但佢係可以用廣東話溝通嘛。
Surveyor方面都係有HKer業主介紹同埋律師介紹，本來一間屋時就應該係業主介紹嗰個平啲，但兩間屋就變咗律師介紹個間俾多啲折後變得平咗，就係咁揀咗律師介紹嗰間喇。
搵Surveyor嘅過程都係Email去簡單講低要買嘅地方，同意咗嘅價錢，佢就會打嚟多啲資料例如邊間地產、需唔需要按揭、睇屋時有冇發覺需要特別注意嘅地方，之後就會介紹有幾款Surveyor Report，一般我哋香港買家需要嘅應該都係Home Buyer Report，我哋律師都有提我哋時間性好重要，而家用呢間Surveyor就話一般十四日內可以完成。只要Offer被接受後就可以安排，盡早完成如果發現到間屋有乜問題都可以盡快要求賣家整好，甚至可以用嚟再傾過個價錢。
其實地產都有介紹律師同Surveyor俾我哋，不過HKer業主千叮萬囑我哋唔好用地產介紹嘅人，因為喺英國地產只收賣家嘅佣，所以佢哋一般都會盡力保障賣家嘅利益，所以我哋都無考慮過用地產介紹嘅人。
暫時第二間Agree嘅已經出咗Memo of Sale，可能因為佢已經一早搵定律師，如果Surveyor Report一Ready就再同大家分享。
#LOTR
#BNOVISA
#三代同堂
#闔家去英國
#HumgagoUK
歡迎轉載或Share，請註明出處，如果覺得有用請Like & Comment，有問題亦歡迎inbox發問，但因為太陽出嚟嘅時間好多時要湊細路兼初到埗都好多嘢要做，如果覆得慢請見諒。
Facebook: https://www.facebook.com/HumgagoUK/
Blog(會多啲延伸分享) : https://humgagouk.com/
Instagram(試業中，太太主場) : https://www.instagram.com/humgagouk/