唔經唔覺個仔已經返咗學三個星期有多，個仔努力地pick up我哋作為父母其實都要不斷學習、進化、適應，相信大家將來嚟到都會有機會遇到呢啲衝擊，太太綜合咗啲返學放學嘅小故事等各位爸爸媽媽做好心理準備……
學校文化差異篇
放學返到屋企沖涼時問哥哥「你件衫有冇污糟呀？」（因為佢而家日日都有Muddy Play Time，係要專登擺對水靴喺學校去泥地度玩，條褲日日都有泥跡，要用prewash洗咗先掉入洗衣機）
哥哥：「有呀！」
舉起衫袖俾我睇，黑哂⋯…
媽媽：「點解會咁？」
哥哥：「I had no choice! 我寫白板，舊擦膠唔見咗，所以用衫袖」
媽媽：「咁你下次情願用手⋯」（須知marker 係permanent 架！）
哥哥：「係老師叫我唔好用手，叫我哋用衫袖架～」
口罩篇：
第一日放學，老師同媽媽講：「佢其實唔洗戴口罩架，除非你自己想啦」
據報第二日一返到學，老師就叫個仔除咗佢⋯…
書包篇：
老師第一日就同我哋講唔洗帶書包，其他小朋友全部都係拎住水樽、食物盒就入學校。
一星期有兩日會有故事書拎返嚟睇，用個A4 file袋裝住（永遠拉唔埋鍊）有一日就跌咗本喺車⋯…
咁有日哥哥就話想揹袋帶書返學同拎書返嚟，唔洗咁狼狽。
點知放學老師就同媽媽講「唔好俾佢帶袋返嚟啦，it’s not even allowed.」
功課篇
當我哋以為喺香港返開學，嚟到做功課應該無乜大問題時，第一日放學收到張功課都真係呆咗⋯…
“Split digraph”
係咩嚟架……做咁多年人都未見過呢個字…⋯估唔到教6歲小朋友功課就要Google……
搞完一輪就做啦，本身仲以為係好普通嘅閱讀理解，點知最後果題係”Please summarize the passage”
汗顏……
本來以為外國讀書就係輕輕鬆鬆三點鐘就放學返屋企玩嘅生活，原來都要加把勁去追趕英國同齡嘅小朋友嘅進度，呢個2020年多得武漢肺炎搞到個仔由K3至一年班正式返學嘅日數加埋可能唔夠50日，跟住就嚟到英國返學讀Year2，除咗學習進度上要追趕外好明顥學習態度都要作出好大調整，好彩老師都有特別協助佢適應新環境，亦特別安排咗啲一對一嘅環節去教佢由基本概念學起，上星期仲特別叫我同太太送完個仔返學後同佢見面，分享返學校嘅教學方法同埋想我哋點樣喺屋企幫佢追上進度，而家睇住佢一日一日進步同埋每日接放學就同我哋講識咗邊個新朋友、同朋友仔今日玩咗啲咩、話俾我哋知新學嘅內容同唱新學嘅歌俾我哋聽，都係令到父母有不枉千里迢迢嚟到英國嘅感動。
#LOTR
#BNOVISA
#三代同堂
#闔家去英國
#HumgagoUK
歡迎轉載或Share，請註明出處，如果覺得有用請Like & Comment，有問題亦歡迎inbox發問，但因為太陽出嚟嘅時間好多時要湊細路兼初到埗都好多嘢要做，如果覆得慢請見諒。
Facebook: https://www.facebook.com/HumgagoUK/
Blog(會多啲延伸分享) : https://humgagouk.com/
Instagram(試業中，太太主場) : https://www.instagram.com/humgagouk/