如果有碌過我哋IG/FB Story嘅話應該都會見到我哋琴日去咗邊，就係出咗城去咗London Oxford Street睇聖誕燈飾喇！
今次係我哋嚟到英國兩個幾月以嚟第二次出城，第一次出城其實都想出文同大家分享，題目會係《星期六/日，人在英國，iPhone突然死亡點算好？》，可能之後再補返。
今次嘅出城之行其實都無預計過，因為我哋原本以為只係星期四一日家長日，第二日就要返番學，點知原來係有一連四日Long Weekend，而孩子的媽一直好想一家去Oxford Street睇燈飾，又唔想星期六日出街咁多人，又怕等到放聖誕假先去會全英國嘅家庭都湧出去，所以我哋星期四就決定天氣OK的話星期五就去睇燈飾啦。
交通方面有諗過自己揸車出去，但因為之前睇車時有睇過架車係喺Central London，打電話想book試車時俾佢一句 “How confident you are driving in Central London?” 拋窒咗，所以對於揸車入倫敦都有啲保留，又怕搵唔到地方泊車又怕唔知規矩俾人抄一抄又唔見一百幾十磅又怕揸返嚟段路黑媽媽有危險，同埋揸車其實無乜So，一嚟俾泊車同俾Congestion Fee(£15)，二嚟仲要時間上慢過火車，所以最後都係決定搭火車出去。
就係咁，我哋食個Early Lunch就出發，有公巴士我哋出火車站就可以慳返十分鐘路程，如果有留意開我哋個Page都應該知道我哋住嘅地方同倫敦距離大概30分鐘火車車程，出到去再轉underground大概50分鐘左右就去到Oxford Street喇。
出到嚟Oxford Street行呢段路都算係我哋呢2個幾月以嚟要暴露喺戶外最長時間嘅一次，所以小朋友同大人都要著充足禦寒衣物，如果仲有要坐BB車嘅小朋友的話，強烈推介要買俾BB在BB車上收埋對腳嘅腳套呀（真係唔識廣東話點稱呼呢舊嘢，因為香港根本用唔著）！我哋買咗呢款係Universal唔同BB車都用得，琴日第一次用，個女舒服到喺BB車度安靜咁瞓足兩三個鐘，個仔一見到就好想可以坐入去呀(可惜你已經太大個喇仔)。
產品Link: https://amzn.to/2VG1iDs
哥哥成個過程都算配合，所以我哋都一出到去就獎佢食個麥記開心樂園餐，行過Hamleys都俾佢入去兜個圈睇下玩具，鼓勵佢繼續努力行落去。
到差唔多黃昏日落(即係下午三點幾四點)，我哋就離開啲舖頭唔Shopping行出大街度準備睇燈飾喇，好感恩原本全日都天灰灰咁，我哋出去時俾我哋睇到勁靚嘅Magic Hour，好多人都同我哋一樣一路不斷搵有利位置去影靚相，由黃昏個天黑齊就影啲燈飾，大人就揸大機影相，小朋友都俾佢揸住部高普(aka GoPro)綁住喺手一路拍片同影相，佢自己都拍到不亦樂乎，連佢自己都話好彩有跟埋爸爸媽媽出嚟睇燈飾。
妹妹我哋就去到最靚嘅天使造型燈飾先摷醒佢，佢原本仲一臉不爽我哋整醒佢，但當佢睇清楚見到咁夢幻嘅燈飾佢馬上好開心話：「真係好靚呀媽媽！」
最後咁耐無出過街食飯，我哋就book咗Burger & Lobster等我哋大人去得擦返餐好嘅，原來而家Kids Menu仲免費
來源網站:
三代同堂 闔家去英國