咁大棚人嚟英國，雖然我哋成功買到第一間屋，但外父外母其實無停過睇樓，高峰試過一日走三四場，平日如果約到睇樓我哋多數都會約下午近放學前，咁就可以順便接埋個仔放學唔駛走多轉，但好多時啲地產/業主都鍾意搵個星期六做Open Day咁，啲有興趣嘅買家就排住條十幾二十人嘅隊，佢腳尖頂住我腳踭咁入去每人限十五分鐘咁睇，稍為(真係稍為，好多我哋睇落真係會令人唔開胃)好少少嘅盤好多時睇完樓嗰日就四五個Offer俾業主揀，我哋都唔Sure係Stamp Duty Holiday效應定個樓巿真係咁暢旺……
最誇張有時明明見到啲地產網個盤只係Just Added，但打到電話去問已經話Under Offer……慢慢熟悉咗個模式其實有時啲地產如果有新盤，佢會優先聯絡咗同佢哋Register咗嘅準買家先，所以有機會真係好好嘅盤，到個廣告喺Zoopla / Rightmove/ Onthemarket出現時已經太遲， 已經俾第一輪嘅準買家睇完揀完出埋Offer，亦試過見到Just Added同日打去想約睇樓已經要排Waiting List，應該都係已經俾啲Registered嘅人先報咗名。
開始搵樓，建議大家先喺各大地產網Set 好心儀地區同埋物業種類嘅Alert，再留意心儀地區入面有乜地產Agent較活躍/多盤，就打去/直接踩落去Register叫佢有盤通知你，記住英國好大，每個區嘅地產Agent都唔一樣，有啲真係家庭式咁只係做自己嗰區，紮根二三十載咁。最好係同一兩間嘅Agent打好關係，傾多幾句，有好嘅盤佢哋會搵你先，真係睇啱又可以易啲摸到底價同可能會幫你講幾句說話。
如果真係見到地產網上有盤想睇，都建議大家打電話落去，雖然Email 應該比電話溝通會容易同清楚啲(因為有時啲街名又唔係太sure點讀，講價錢時講幾多Hundred Thousands又講到口窒窒，有時又遇咗啲口音較重用電話好難聽)，但即時對話直接約埋時間睇樓會係最好，始終佢見到你個Email再打俾你，點都會慢啲，有時明明好想睇嘅盤可能就會因為咁約唔成，所以都養成咗一見到有想睇嘅就打去，打得最密嗰間有時講第一句佢已經識叫我Mr. XXX……
亦都試過有啲盤睇網上資料好似好啱心水，但真係約唔到睇樓，我哋就問可唔可以直接出Offer跳過咗睇樓，但啲地產都係唔接受的，可能佢怕萬一真係Accept咗，點都會要求去睇下間屋先Exchange Contract，到時先改變主意仲麻煩。
終於約到睇樓，又睇得啱，到出Offer時，以我哋經驗呢排個巿都要同人爭，價高者得，當然如果係有能力一筆過俾嘅Cash Buyer都會有優勢嘅，最近我哋如果想出價嗰啲屋最後都會比標價更加高先有機會被Accept……
我哋亦一路有同律師朋友保持聯絡，其實隨住越嚟越接近六月尾，如果再無延期的話，其實而家先Accept Offer的話都要有心理準備未必趕得切Deadline前成交，雖然我哋知佢做嘢好盡責同快手，但始終仲要視乎對家有冇Chain，賣家律師嘅處理同Surveyor Report，就算係Cash Buyer，都有啲抆水……
最近有個比較特別嘅經驗都想同大家分享下：
睇到有間屋擺咗出嚟都一段時間，諗住睇啱有得壓下價，睇相新裝修，又做好曬Extension同Loft Conversion(而家自己間屋搞緊先知有幾磨人，一嚟等Council批要時間，二嚟建築個成本都唔細)，大家睇完間屋後都好滿意決定去馬，正式開始同呢個賣家漫長嘅交涉過程(開始打呢篇文時未知結果，不過打到呢度已經知道了)。
出第一口價時我哋一般會參考地產網上嘅資料(同區/同一條街樓價，最好搵到想買間屋嘅大概估價)，例如呢個網：
https://www.zoopla.co.uk/house-prices/
當時第一口價係比標價低，所以轉身射個三分波嘅時間已經被Reject，話只會考慮高於標價；
Match標價，再被Reject，地產都有俾指標話佢希望高於標價2萬英鎊，跟住我哋就喺呢2萬鎊之間拉扯……
除咗價錢，仲要傾交樓期，我哋講到明想趕Stamp Duty Holiday，點知佢就話要俾時間佢搵屋搵學校，Guarantee唔到……地產就話Match賣家心目中嘅價啦，佢先會肯六月底前搬出，點知來回多幾轉又話個女啱啱收到Offer (Council應該4月中派Offer)，就算Match佢個價都唔肯六月底搬出……
正所謂千金萬買心頭好，我哋都再讓多步，聽地產獻計，用個大家都接受嘅中間價，先喺六月底完成交易，再租返俾佢三個月等佢有足夠時間搵屋搵學校，最後個Offer仲要係象徵式咁租俾佢但唔收租，佢思前想後又話要同老公討論，點知今朝收到地產電話，佢LM佢話我哋俾得太多壓力佢，個女又啱啱有學位，而家索性唔賣……我哋都未計我哋次次都係要等到六點幾個地產先會打嚟話同佢傾完，又有乜新要求，真係搞到我哋心力交瘁……
所以喺英國買樓除咗要有足夠嘅錢之外，都好講緣份，曾經Agree咗嘅，佢由原本話complete咗條Chain，但後尾又改口話未得要等，我哋決定放棄，今次願意俾個期佢等佢搵，但又話我哋俾太多壓力佢，感恩我哋喺喺呢次交涉上都有所得着，反而個地產方面就真係白忙，最後兩面不是人咁……
想知道Stamp Duty Holiday前後嘅分別，可以用呢條Link check下: https://www.stampdutycalculator.org.uk/
如果各位HKers有需要識講廣東話，做事又盡責快手嘅英國物業買賣律師，歡迎PM我呀。
題外話：英國網購必備TopCashBack，未申請嘅歡迎用我嘅Referral Link (你累積滿£10 cash back會有多£5 sign up bonus): https://www.topcashback.co.uk/ref/humgagouk
#LOTR
#BNOVISA
#三代同堂
#闔家去英國
#HumgagoUK
歡迎轉載或Share，請註明出處，如果覺得有用請Like & Comment，有問題亦歡迎inbox發問，但因為太陽出嚟嘅時間好多時要湊細路兼初到埗都好多嘢要做，如果覆得慢請見諒。
Facebook: https://www.facebook.com/HumgagoUK/
Blog(會多啲延伸分享) : https://humgagouk.com/
Instagram(試業中，太太主場) : https://www.instagram.com/humgagouk/