今日第一次帶咗個仔去上跳舞堂, 疫情前喺香港一直有學開,個仔都好鍾意,本來佢都有啲扭擰,但媽媽鼓勵佢之後佢都欣然去試。上堂地點係借人哋教會嘅場地, 距離屋企話近唔近話遠唔遠…揸車6分鐘, 行路31分鐘, 搭巴士21分鐘(但車程只佔4分鐘, 大部份都係行) 今日好好彩有舅父車, 之後又要麻煩公公喇..
之前喺香港間學校收費唔平,而且好COMMERCIAL,個個TERM都係着重最尾嘅表演,又要收錢排隊入場又要買表演服又要一早去REHERSAL…不過勝在近屋企老師又好好人,所以就冇辦法。
今日上短短45分鐘,媽媽覺得內容好豐富充實, 唔單止令小朋友容易上手, 仲俾到好多自信大家! 其實講真TARGET 4-7歲嘅小朋友真係唔洗下下執動作務求”畫面要靚”, 好似今日個老師咁, 教D BASIC MOVE, 得閒讚下小朋友”WELL DONE, PERFECT, I LOVE IT”, 令小朋友有動力學落去, 每一堂都係開心咁上, 咪幾好囉…
最令我IMPRESSED 係佢臨尾叫大家圍圈, 叫大家輪流出去中間FREESTYLE !!!嘩, 我心諗咁細個就FREESTYLE, 佢試堂姐, 一定淆底啦…點知叫佢前已經有3個小朋友笠水唔出去跳, 而我個仔亦都順勢唔出啦。完咗老師就話”頭先邊個驚咗唔肯出嚟呀? 做咩要驚呀? 我哋係朋友嚟架嘛!我哋互相支持一齊努力學習, 你哋個個都做到架嘛係咪?” 然後就叫小朋友逐個出去做老師教過嘅DANCE MOVE。小朋友逐個出去做DANCE MOVE之後老師就嚟第2 ROUND FREESTYLE。出奇地, 第2 ROUND全部小朋友都出咗去做自己嘅FREESTYLE!!!!!!!!!!! 而我個仔仲做咗冇正式學過嘅喺地下反嚟反去『地板動作』 *FACEPALM* 老師仲要讚佢” PERFECT! I LOVE YOUR MOVE!”
最後2分鐘, 以為落堂啦, 點知仲玩一次MUSIC STATUE, 令課堂非常生動有趣。個仔上完好開心同我講鍾意上, 又同我講”老師話鍾意我個MOVE呀!” 嗯…對小朋友嚟講, 興趣班係要上得開心,令佢有自信,繼續向鍾意嘅興趣發展, 而唔係為咗表演, DVD, CERT, 考試,PROFFO,面試.…不停練習、追求完美, 打沉小朋友嘅興趣。
仔呀，因為疫情、移民、未安定落嚟、種種原因令你過唔到之前嘅生活, 但係漸漸睇到你融入社會, 重拾學習求知嘅熱情, 爸爸媽媽真係覺得再辛苦都值得, 一齊加油!
歡迎轉載或Share，請註明出處，如果覺得有用請Like & Comment，有問題亦歡迎inbox發問，但因為太陽出嚟嘅時間好多時要湊細路兼初到埗都好多嘢要做，如果覆得慢請見諒。
Facebook: https://www.facebook.com/HumgagoUK/
Blog(會多啲延伸分享) : https://humgagouk.com/
Instagram(試業中，太太主場) : https://www.instagram.com/humgagouk/