喺香港大家日日都起身返工放工食過晚飯Hea到一兩點跟住第二朝又起身返工，就算轉工好多時都係工接工，真正完全無工作束縛嘅時間都好可能只係幾星期。
我諗我都係一個幾典型嘅香港八十後打工仔，畢業出嚟撞正金融海嘯，搵咗幾個月工由一萬蚊一個月都唔夠開始做咗1X年嘢，輾轉打過幾份工，有遇過仆街上司，但更有幸遇到好好嘅同事同賞識自己嘅上司，亦有俾到我發揮嘅崗位，一路走來事業發展未去到年薪百萬嘅金融才俊但總算對得住自己亦對得住對我有期望嘅人，咁多年打工生涯放過最長嘅假可能就係前年去歐洲放咗2X日。
感情上感恩遇到嗰時嘅女朋友而家嘅老婆亦有開明嘅外父外母，計下計下，原來老婆已經同我一齊走過接近一半嘅人生，感謝主俾咗一對健康嘅仔女我哋，而呢對仔女亦都俾咗我哋最大嘅原因要離開香港移民嚟英國。
其實自從有咗仔女後我哋都覺得無乜幾時叫真正放假，唔駛返工嘅日子其實喺香港都會安排密密麻麻嘅行程帶仔女學呢樣學嗰樣/去野餐/去沙灘/行街，有時放假真係仲攰過返工。
眨下眼，喺放咗超過二百日假後，啱啱過咗嘅星期五都幾大機會係我今個學年最後接送個仔返學放學，拖住佢手由學校行返去車嗰程都難免有啲感慨，感慨如果一路溫水煮蛙喺香港太平盛世，可能我仲係Loop緊上面講嘅嘢，佢由六歲至七歲嘅過程入面最有印象嘅會變咗係去日本唔知邊度玩，而唔會係同佢一齊嚟一個新地方，一齊經歷居無定所，一齊搵屋租，一齊買車，一齊搵新學校，一齊拖住佢手帶住有啲不安嘅佢走入新校園，放學時第一次見佢班主任睇住佢好興奮咁帶我哋入班房Show佢嘅座位，一齊走過Lock Down同Home Learning嘅三個月，一齊買到一間屬於我哋嘅屋，喺佢接近七年嘅人生入面，感恩可以同佢面對呢七個月嘅新挑戰，睇到佢慢慢適應同見到佢同同學老師嘅交流都係不斷鞏固我哋移民信念嘅強心針。
聽日瞓醒，就到老豆要去面對新挑戰喇，英國打工初體驗，因為要先上一段時間Training而Training一定要喺Office嘅情況下，都要朝九晚五咁返工去到佢呢個學年完，亦都要特別鳴謝之前提過透過呢個Blog相認成為朋友嘅HKer同學仔父母，麻煩佢哋喺呢段我要揸車返工，又未買到第二架車俾公公接送佢返學放學嘅期間幫忙接送埋我哋個仔。
本來無乜嘢嘅仔臨瞓前忽然喊得好悽厲話唔想爸爸返工，話爸爸返到嚟就天黑無時間陪佢玩，嗯…其實夏天爸爸返到嚟都仲有三個鐘先天黑，又其實我都只係遲佢兩個鐘左右返到屋企……
接下來亦都要辛苦太太去面對大大小小嘅事，由其是間屋嘅裝修都未有進展，以後就變咗要星期六日先可以出去處理……
#LOTR
#BNOVISA
#三代同堂
#闔家去英國
#HumgagoUK
歡迎轉載或Share，請註明出處，如果覺得有用請Like & Comment，有問題亦歡迎inbox發問，但因為太陽出嚟嘅時間好多時要湊細路兼初到埗都好多嘢要做，如果覆得慢請見諒。
Facebook: https://www.facebook.com/HumgagoUK/
Blog(會多啲延伸分享) : https://humgagouk.com/
Instagram(試業中，太太主場) : https://www.instagram.com/humgagouk/