話說我哋成日都覺得個仔係我哋全家人之中最高危嘅人，因為佢日日返學又唔戴罩，小朋友又唔係好高防疫意識……家中長老又有長期病患，所以一直都有啲擔心。
上星期四晚瞓瞓嚇個仔就醒咗，大嗌好熱，發癲除衫，一路就呻吟瞓唔到直到夠鐘起身返學。由於嗰日天氣暖返啲，所以我地都覺得個暖氣係熱咗啲嘅，就冇留意。
到放學佢都係好攰好冇精神，又話頭痛頭熱，媽媽即刻驚到上NHS網準備預約做TEST，又睇最近邊度有Drive Through Test始終全程留喺架車點都安全過要去診所，個仔返到屋企又冇胃口又扭嚇扭嚇，一度佢原來燒到39度， 我哋即刻俾退熱貼同退燒藥佢，又盡量安排佢喺房遠離全部人，特別係個妹，再夾佢早啲上床去休息，佢都攰到無乜動作好快就瞓咗。
感謝主，去到第2日佢又回復精神，爸爸先醒起佢星期一打咗流感疫苗，應該係少少發燒嘅反應，第二朝一早起身已經好精靈同有返胃口。
打流感針呢單嘢又有啲離奇，事緣有日冇啦啦有張通告問我哋打唔打疫苗，我哋之前喺香港都有打開，所以都諗住俾佢打，但上面要我哋填NHS NUMBER，不過LOTR嘅我哋係未有，但我哋都照填就交咗，心諗冇得打就由佢啦，點知有日個仔返到嚟，喺我哋好忙咁同律師講緊嘢嘅時候，冇啦啦好輕描淡寫咁講左句「爸爸媽媽，我今日噴左鼻呀！」我哋當時都只係反應「嚇？哦……打咗呀……」就繼續同律師傾嘢，所以爸爸媽媽根本醒唔起呢件事……
好彩最後只係虛驚一場，大家總算鬆一口氣。
#LOTR
#BNOVISA
#三代同堂
#闔家去英國
#HumgagoUK
歡迎轉載或Share，請註明出處，如果覺得有用請Like & Comment，有問題亦歡迎inbox發問，但因為太陽出嚟嘅時間好多時要湊細路兼初到埗都好多嘢要做，如果覆得慢請見諒。
Blog(會多啲延伸分享) : https://humgagouk.com/