正式開工之日，靚仔準時帶住五個人嚟！佢哋一行六人，好有氣勢。打個招呼，二話不說，即刻開工。唔使半晝，該拆嘅都差不多拆曬。各式各樣嘅工具同埋建材魚貫進場，成間屋非常忙碌。心裏暗喜，自覺有運行，搵到個好builder，有衝勁又咁靚仔！最令我哋驚喜嘅係，佢竟然連流動廁所都租埋，咁就唔使擔心疫情期間有外人用我哋個洗手間啦！
由於狐狸改建車房爛尾，靚仔要承接車房剩下嘅工程。經過仔細檢視之後，佢話之前個builder其實冇諗住幫我哋完成，因為有部分做得好求其，正常唔會咁做。靚仔用咗大約一個月，個車房終於成為套房。當中包括掘地、落石屎起地基、行渠等大工程。因為唔掘地根本就行唔到車房出嚟嘅污水渠同埋屎渠。當我哋睇住呢一切嘅進行，就知道狐狸嘅大話有幾離譜！
就係咁樣，間屋每日都有進展，我哋雖然要食塵兼瞓廳，都毫無怨言。二寶可以搬入套房之時，就係我哋瞓廳嘅開始。我哋非常樂意配合，將所有嘢搬落樓下或上loft，好讓佢哋方便工作。靚仔話好快架啫，樓上只係整洗手間同油油，兩星期攪掂。於是我哋快快去訂地氈，希望可以快D攪掂樓上。當時仲係lock down，太朗要網上學習，佢只可以喺廳上堂，咁次郎就梗係會騷擾嚇佢咁啦！我哋每日望住進度，眼見只差油油，但負責嘅油漆師傅經常甩底。佢係靚仔搵番嚟幫手，不過從來都只係下晝四點半之後先會出現，皆因佢日頭有自己嘅油漆工作，放工或假期先可以嚟。咁都唔緊要，但有好多次佢應承咗星期六、日嚟，最後竟然no show。Send message問靚仔，佢都冇回應。靚仔作為project manager其實要負責，但佢竟然唔聽電話又唔覆message，我哋嘅寶貴光陰就係咁俾佢哋白白浪費。而大家嘅關係亦變得緊張，經常對我哋黑面，又迴避我哋嘅問題。結果，說好了的兩星期，最終變成兩個月。我哋瞓咗兩個月廳，鋪地氈嘅日子改了又改。